【聲明】港生活網站並無進行電話推廣活動

菁雲野菌養生晚宴 盛夏必試推介

發佈時間: 2016/08/08

每年夏天,菁雲野菌養生晚宴都喺期待名單上,今年活動繼續喺喜來登酒店天寶閣舉行,特別的是唔止有得食仲有得睇!晚宴開始前,先欣賞唔同品種菇菌展覽,好得意!呢場年度盛會每道菜食材都由「菁雲」野生食用菌專門店老闆娘黃詩敏(Winnie)供應。Winnie係上環食品出入口老店「聯記號」第三代傳人,十多年前創辦菁雲賣菇。好食材加頂級大廚,先炮製到一場美味佳餚。Winnie多年前游說天寶閣總廚陳小麒合作,自此每到7、8月,野菌「盛放」季節,大家都有機會品嘗到。

盛宴有好多名人捧場,包括名廚Ricky Cheung、鄧達智等;席間遇上同是「菌癡」嘅《晴報》社長麥華章。麥社長話野菌養生宴每道菜都精心炮製,其中最鍾意菜式要數油雞樅、老人頭菌配美國帶子、黑杞子鮮竹笙雪蓮子燉雞。提起黑杞子等食材,原來近年菁雲配合養生主題,搜羅唔少天然食品,包括寧夏黑杞子、桃膠等,除咗健康仲有唔同益處,唔怪一眾姊妹都咁鍾意,下次要搵Winnie問多啲貼士先得!

撰文: 黛安 消息特靈八卦公關
欄名: 八卦名利場