【聲明】港生活網站並無進行電話推廣活動

我撑90後

發佈時間: 2016/08/05

早排網上睇到個post,標題《90後見工等半小時未見老細,即走》,唔知真實定虛構,淨係想加把口,如果發生喺我身上,等15分鐘已經撇咗,90後居然等足半小時,孺子可教也,我撑90後。

「公司對我有expectation,唔希望我遲到;我對公司都有expectation,約咗10點in,𠵱家都10點半,如果你約個客10點,會唔會遲到半小時?」90後理直氣壯,擲地有聲,天下間無人可以反駁。

明知理虧,無講對唔住,無代遲到腦細道歉,反而招招積積:「你喜歡啦,𠵱家係你嚟求工作,等老細係常識。」呢個講法好有階級觀念,代表大部分腦細或者嘍囉嘅真實信念,潛台詞係:我高你低,我尊你卑,我錯你要忍受,總之搵工即係求人,求人就要低聲下氣,就算幾唔合理,都要強顏歡笑,嗗聲吞咗。

90後走前拋低句:「你們這一代奴性很強。」後生仔即係後生仔,雖然講得幾啱,凡事留一綫,日後好相見,唔使勞氣激親自己,亦唔使教精人哋,奴性重,唔慌會與時並進,創作唔慌掂,畀人淘汰只係遲早。可惜,上下不和,勞資對壘,喺見工一刻,顯示「不平等對待」陋習,禍根已經不知不覺種下。

其實,等人無乜問題,只要合理,遲到嗰個表示歉意,直接或者間接,等嗰個感受尊重。禮多人不怪,花花大轎人抬人,一句唔好意思,化解無謂紛爭,增進人與人之間信任,提升工作效率,大模大樣例遲嘅「高中低層」,淨係識以大欺小,永遠去唔到呢個層次。

想人點對你,先要點對人,將心比己,公平啲禮貌啲謙虛啲準時啲,大大聲同捉住你開會嘅「高高層」講:「唔好意思,約咗人面試,走先,唔想遲。」公司士氣由呢句說話開始。

(本欄逢周五刊登)

撰文: 莊偉忠 崇尚反璞歸真的營商信念,以人為本的CEO
欄名: 有種CEO叫做莊