捐二手書包助山區學童 最緊要係雙揹帶

「屋企有唔用嘅背囊？」訊息傳畀友人，唔少人都話屋企有好耐無用嘅背囊，即刻話唔好嘥咗，捐畀山區小朋友做二手書包啦！服務國內廣西山區貧困學童、孤兒嘅雲彩行動，暑假再為貧困學童收集二手書包。

聽講首輪二手書包回收早前喺唔同學校開展，暑假就到公眾回收，9月11日前港九新界都有回收點。同公關姊妹傾過，二手書包有少少要求，要整潔、無損壞之外，最緊要有兩條揹帶同啱小學生身形。因為佢哋服務嘅學童多數係小學生，平日要行幾個鐘頭山路返學，單邊揹帶或太細嘅幼園生書包、有金屬板護脊同拉桿書包都唔啱用。講到呢度，大家梗係想知邊度有回收點，港島有天星碼頭Laurence Lai Gallery，回收期到下周一；新界區有屯門H.A.N.D.S商場，回收期到9月11日。九龍區就有LUSH旺角港鐵站B1出口門市，呢度仲有山區相片展覽，其他回收點可留意佢哋fb（https://goo.gl/AMMFfn）。