憂密友病況 王喜留港照顧「屋企人」

王賢誌（Vinci）與相戀七年的密友Kevin日前在溫哥華註冊結婚，成為本港娛樂圈首對結婚男同志，王喜在昨日活動上亦有恭賀Vinci。但有報道指他的同性密友明仔近年患病暴瘦，王喜連聲表示：「多謝關心。」

王喜於2002年被踢爆與明仔於何文田同居多年，兩人多次被影到結伴出入。近日有指明仔體重暴跌，傳他患上重病，王喜為了籌醫藥費而四出尋找名醫。昨日，王喜出席《好聲音漫步世界第二站-法國》開鏡儀式時，他表示不會隨行赴法國，並解釋：「屋企有人唔舒服，七月先去完塞班島，今次要去法國18日，本來搵我做導演，但始終去得太耐，萬一中途有咩事，就算收到電話都趕唔切返港。（病情如何？）OK，有心。」

他坦言有些錢是賺不完的，問他最近是否忙於籌醫藥費？他輕鬆笑謂：「睇下邊度有嘢做，等下幾時有工開，依家開始嘗試做幕後。我出年都50歲啦，要幫自己儲定醫藥費。」

對王賢誌有讚無彈

問他可有諗過人生大事？他反問：「生老病死？（結婚呀！）呢啲唔算人生大事，對我嚟講可有可無。婚姻唔係空氣，唔係必須嘅。（結婚可以沖喜一下！）大吉利市，無嘢要沖喜。（羨慕Vinci嗎？）我羨慕Kevin多啲，Vinci咁好，對人又好，對社會又好，對個個都好。」

王喜表示與Vinci都是近年才熟絡，已在FB留言恭喜對方，他說：「心意啫，佢咩都有，一出世就含住金鎖匙，出世後就有事業、有婚姻又有醫藥費。」王賢誌是東華三院副主席，問王喜可有找Vinci幫明仔醫病？他即緊張稱：「唔好喇，畀人調查㗎！」

採訪：Pauline

攝影：林良明

編輯：陳禮恒

設計：KW