獅城《米芝蓮指南》登場

食物變藝術，感動味蕾，也衝擊視覺。獲邀出席新加坡旅遊局活動，欣賞「亞洲最佳甜點師」之稱的Janice Wong（黃慧嫻）即席表演，喺呢位COBO HOUSE by 2am︰dessertbar主廚兼藝術家手上，朱古力、棉花糖變成顏料，畫出創意作品。最得意嘅係，Janice畫完後，叫大家行前兩步，唔止近距離觀賞，仲叫大家用手指點一點放入口，用舌尖感受下。

表演之餘，主持問Janice對新加坡美食有咩感覺，佢話好慶幸大家接受佢嘅創意，仲話因為無框框，獅城先有自己獨特嘅美食文化。講起獅城美食文化，最近新鮮出爐嘅推出新加坡第一本《米芝蓮指南》，可以話係對當地飲食文化嘅認同。

新加坡駐港總領事傅光燊都讚，獅城美食唔止fine dinning，仲有好多地道滋味。佢仲話，希望米芝蓮指南令更多人了解當地飲食文化。新加坡旅遊局大中華區署長兼首席代表劉詩蘋就話，好開心新加坡都有《米芝蓮指南》，期望大家跟住本指南搵美食之餘，自己再發掘更多地道美食驗，打造屬於自己嘅新加坡美食指南。

講起指南，大家都好奇有咩特別餐廳摘到星，新加坡旅遊局中國華南地區、香港及澳門區處長黃慶祥提到，兩間獲頒發米芝蓮一星嘅熟食中心食店，「大華豬肉粿條麵」及「香港油雞飯麵」，只需要新加坡幣$2價格，即係大概港幣12就食到米芝蓮美食！