【聲明】港生活網站並無進行電話推廣活動

PopCorn×Expedia VR影院帶你去旅行

發佈時間: 2016/08/02

珊瑚礁中追蹤鯊魚、高空跳傘等活動,一般人會覺得鼓起勇氣就做到,但對傷健人士嚟講,體驗緊張刺激時刻好似遙不可及。近年虛擬實境(VR)技術愈趨成熟,唔少相關遊戲出爐,港鐵商場PopCorn搞搞新意思,同網上旅行社Expedia合作,用VR技術為傷健人士圓夢。Expedia香港區高級市場經理曾婉怡話,今次合作喺商場推出《360°夢想成真遊世界》虛擬實境全景影院(VR Cave),相信可為更多人圓旅遊夢,感覺好有意義。

聽講VR Cave入面,傷健人士可以透過VR影片體驗各種刺激活動。VR影片效果咁震撼,全靠幕後拍攝團隊努力。聽講影片拍攝由年輕導演陳楷負責操刀,製作團隊根據東華三院賽馬會復康中心一班院友同大口環根德公爵夫人兒童醫院蔡宇航嘅夢想,攀山涉水去菲律賓、荷蘭同新西蘭,務求將院友夢想旅遊目的地「帶番嚟」;好似喺新西蘭拍攝被譽為人間仙境嘅蒂卡波湖、時速二百米嘅高空跳傘等。

連復康服務部社服主任袁漢林都大讚今次合作,「院友極少出外活動,但對外面世界仍然非常好奇,VR影片為佢哋帶嚟奇妙體驗。」

撰文: 黛安 消息特靈八卦公關
欄名: 八卦名利場