【聲明】港生活網站並無進行電話推廣活動

屯門市廣場暑假狂歡 玩樂體驗夠新鮮

發佈時間: 2016/07/26

商場點樣可以吸引更多人流?信和集團租務部總經理陳欽玲(Ronnie)話,屯門市廣場吸客秘訣係「開心元素」,又強調「只要顧客覺得開心,就會嚟(商場)多啲。」點先夠開心?Ronnie認為,吃喝玩樂好重要,趁住暑假佢哋特別搵Sanrio人氣角色,傾巢而出去晒屯門市廣場,食埋奧運熱潮,用運動做主題,打造競技場裝置。

聽講競技場入面,唔止有得影相打卡,仲有好多遊戲玩,好似布甸狗會喺射箭場上等你哋去挑戰眼界、Kuromi會同你比賽跳高等等。Ronnie仲講起,以往同Sanrio合作過,顧客都好鍾意,所以有信心今次暑假推廣會再帶動人流,仲預計7、8月營業額會有16億𠻹!

此外,商場租戶都有新體驗,好似眼鏡品牌eGG,喺屯門市廣場推出首間「VR虛擬實境」主題Pop-up store,大家可以試下帶住VR眼鏡玩各種刺激遊戲,例如過山車等。Ronnie親身去咗試玩,笑說自己「玩到一半要停低,因為太刺激」,仲叫大家一定要體驗下。咁多玩樂體驗,顧客梗係鍾意,購物意慾同歸屬感都多啲。飲食方面,商場都無鬆懈,Ronnie話,屯門市廣場不斷引入優質食肆,今個夏天仲有全港首間韓國雪糕品牌Kiss the Tiramisu,希望令大家時時都有新鮮感。

撰文: 黛安 消息特靈八卦公關
欄名: 八卦名利場