【聲明】港生活網站並無進行電話推廣活動

美心中菜 懷舊點心「無老點」

發佈時間: 2016/07/25

飲茶歎點心,一件點心,賣相要好,味道要吸引,好考功夫。美心中菜最近嘅推廣,大廚花咗好多心思,帶大家「返到50至70年代」,用舌尖回味經典名菜。

今次主題推廣「老點家老菜」,隨便揀一道菜,師傅講出嚟嘅烹調步驟同背後故事,都令人有驚喜。好似望落似西式菜嘅「鮮果沙律煙鯧魚」原來係以前擺酒宴客名菜,食落啖啖煙熏香味;「公館高湯鴿吞燕」,全隻乳鴿去骨再釀入燕窩等材料,唔止湯夠入味,望到隻鴿就知道師傅刀功有幾好。

另外,「西關大少桂花扎」,係用瘦肉、冰肉捲實膶腸同鹹蛋黃,搽上蜜汁再燒,切片後望落似桂花而取名,食落惹味到停唔到口。

公關姊妹話,今次唔止得晚市,有埋午市同茶市嘅「老點心系列」,原因係品牌收集唔少顧客意見,知道大家懷念舊時嘅點心,希望師傅製作嘅多款懷舊點心,大家回味一下。拎到張點心紙就覺得好吸引,懷舊灌湯餃、滑雞球大包、失傳豬油包,好多都係聽過未食過,終於可以一次過試晒。

講起點心,「梳乎厘燉蛋」同「脆皮倫教糕」可以話係必試推介!前者薑汁燉蛋上面加梳乎厘,再鋪果仁粒,一次過食到兩款甜品,味道好夾之餘,燉蛋保持到滑溜口感。至於後者,倫教糕即係白糖糕,師傅加咗少少創意,面頭加薄罉再煎香,鍾意食甜品嘅朋友肯定抗拒唔到。

撰文: 黛安 消息特靈八卦公關
欄名: 八卦名利場