【聲明】港生活網站並無進行電話推廣活動

麥當勞推動親子閱讀 書展推珍藏版Barbie

發佈時間: 2016/07/22

麥當勞近年落力推動親子閱讀樂,今個書展點會唔「出招」?八卦完先知,品牌好有心思,知道Barbie同Thomas & Friends有好多擁躉,今年特別同Mattel合作,喺香港推出首個用佢哋做主題嘅故事書系列!

每套主題故事書系列連玩具禮盒套裝,售價係$318,今次書展首次獨家發售,入面包括8張開心樂園餐美食券、全套8本Barbie同Thomas & Friends故事書、仲有珍藏版Barbie公仔同Thomas & Friends Mega Bloks積木火車。有得睇故事書,又有得玩,小朋友梗係鍾意啦!

荷里活 奧海城主題餐廳

公關老友話,品牌落足心機,驚喜當然唔止一樣。原來,鑽石山荷里活廣場同奧海城兩間麥當勞餐廳都有新搞作,分別變身Barbie同Thomas & Friends主題餐廳,荷里活分店聽日正式登場,奧海城分店就下星期五同大家見面,粉絲要mark實兩個日子去影相打卡啦!

主題餐廳有新布置之外,原來仲有一款「餐廳限定」嘅限量版禮盒,入面除咗書展禮盒嘅書同玩具,仲會有1件全球首推、啱Barbie着嘅香港麥當勞餐廳業務推廣組組員制服,即係小朋友可以幫Barbie換衫,變身做麥當勞姐姐,好有珍藏價值。

撰文: 黛安 消息特靈八卦公關
欄名: 八卦名利場