都會海逸網購85折吸客 千鶴歎「廚師發辦」6道菜 $800有找

網購試得多，有人話餐飲類別矜貴選擇唔多？黛安同都會海逸酒店市場及傳訊總監許慧韶（Virginia）傾開，佢話「依家有得揀！」原來4月開始，都會海逸eShop積極推唔同網購選擇，有自助餐、蛋糕等，顧客反應好好。為咗回饋粉絲同吸納更多人客，酒店旗下餐廳「千鶴日本料理」，首推Omakase廚師發辦套餐，即係客人決定價格預算，廚師就用當日最啱時令食材烹調獨一無二餐單。Virginia話，千鶴嘅料理一向受歡迎，大廚鄭偉富亦有多年經驗，由佢主理餐單肯定有保證。

千鶴廚師發辦套餐有3款，6道菜$800；8道菜有$1,000同$1,200兩個選擇，Virginia笑住話，今日起網購仲有優惠，即時85折！黛安計過，85折後計埋加一，6道菜每人只係$760，價錢都幾親民。Virginia仲畀咗個貼士，「網購時有得揀埋日子，好方便；但要留意套餐每日限量供應，另外紅館有show嘅日子，套餐要8點半後先有得食。」