海洋公園哈囉喂新搞作 捉鬼敢死隊闖鬼屋

捉鬼敢死隊成員喺太古城出沒！原來係新版《捉鬼敢死隊》暑假載譽歸來，海洋公園食住個勢同Sony Pictures合辦首影禮，管理層仲話今年10月海洋公園哈囉喂全日祭會推出香港首創「捉鬼敢死隊Live！」鬼屋𠻹！

聽海洋公園演藝節目總監歐陽綺華講，新鬼屋會喺動感天地，一間鬼屋兩種體驗，到時鬼屋入面會有全新系列電影經典場景同情節，好似新版電影嘅陰森紐約街頭同地下鐵場景。好八卦仲有咩特別，佢就話實際內容未講得住，但鬼屋會用特技、投射等，驚嚇同驚喜都一定有！

除此之外，講起小朋友通常又驚又想玩，到時嘅「捉鬼敢死隊學堂」啱晒一家大細玩！家長同小朋友化身捉鬼敢死隊成員，拎起鐳射槍捉惡鬼，親身去到《捉鬼敢死隊》第一、二集嘅基地，即係消防局同實驗室入面，家長可以一邊講解，一邊懷緬當年經典場景。

海洋公園市務總監鍾志超就話，今年哈囉喂全日祭票價無咩變動，好似普通成人門票價及優越成人門票照舊係$385同$690，又預計人流會較舊年100萬人次稍有增長。