梁家輝想捉四大天王拍《寒戰3》

梁家輝昨日聯同《寒戰2》導演陸劍青到奧海城，齊入戲院謝票。影片上映九天已突破4000萬票房，氣勢勁過第一集。對於影片留有伏綫，家輝笑指將會負責聯絡演員加盟第三集。

周潤發在《寒戰2》對梁家輝說：「我下半世咩都唔做，只係招呼你一個。」料不到迅即成為網民潮語，家輝笑言：「難得影帝剩係照顧我一個，咁聽日陪佢行山、食盆菜。」

踩紅館同城城慶功

今集發哥雖然戲份不算多，但依然搶戲，玩得興起的發哥更催促劇組盡快開拍第三集。導演陸劍青直言壓力愈大、動力愈大，家輝表示：「我係退休人士，本來打算環遊世界，退休前休假等拍呢套戲。」

票房大收，預計稍後舉行祝捷會，不過另一主角郭富城正埋首準備紅館個唱，家輝笑言：「不如趁城城Encore位，我哋一齊上台慶祝都好喎！」問家輝會否有分紅？他爆老闆可能請所有人去日本旅行。導演就直言已構思開拍第三集，問到下集是否再有強勁新成員加入？家輝續說：「香港演員仲未出齊，四大天王都未齊，說不定搵劉德華加入呢！（華仔首集已有份客串）」

撰文：Pauline

攝影：林良明

編輯：陳禮恒

設計：梁政敏