牛丸赴法國直擊歐國杯 偷師迪保斯基帶隊操練

四年一度歐洲國家杯啱啱完結，遠赴法國為樂視體育直擊賽事嘅團隊前晚先落機，噚日就同一班傳媒飯聚，分享新鮮滾熱辣趣聞。東方足球隊嘅教練牛丸（陳婉婷）同資深體育新聞主播馮堅成睇落毫無疲態，反而互笠高帽稱對方幽默，合作好愉快。馮堅成更笑說多年無從事新聞報道工作，今次有份報道歐國杯感覺「重拾少男情懷」。

席間，牛丸講起旅程獲益匪淺，佢話，無論係名教練如迪保斯基點樣帶領西班牙隊操練，定係記者會應對外國記者尖銳問題時從容不迫嘅態度，都好值得學習。牛丸仲笑言，香港傳媒對佢非常好，外國記者就直接得多。

牛丸又講起，今次歐國杯無好似以往咁「有足球明星彈出」，反映教練着重整體戰術部署，仲話呢種方法更考教練「真功夫」。被問到足球場上最令人震撼嘅場面到底係咩？牛丸竟然話，「有人喺場上裸跑」，令人哭笑不得。

歐國杯雖然已經告一段落，但足球迷唔洗怕，黛安聽樂視公關姊妹講，另一場盛事─英超聯賽八月份開鑼，到時樂視同樣會播放賽事。佢哋仲話，嚟緊陸續會有唔同宣傳英超賽事嘅倒數活動，身為足球迷嘅你，「千祈唔好錯過呀」！