傳龔嘉欣蜜運中 坤哥待求證才敢送祝福

一度被傳是吳業坤（坤哥）緋聞女友的龔嘉欣，近日有指她戀上富二代陳世俊，令人聯想到她於去年底收99枝玫瑰也是由對方所贈。坤哥坦言對「家姐」蜜運全不知情，要是真的話定必送上祝福。

吳業坤和網路紅人盤菜瑩子昨天到新城電台受訪，並宣傳二人合作的廣播劇。坤哥大讚盤菜瑩子的聲綫和樣子都很甜美，笑言與對方半年前一齊拍過廣告，早已交換聯絡方法。

問他不怕傳緋聞嗎？坤哥坦言：「真係驚，個個都驚，佢話晒係宅男女神喎，之前睇到啲post，有咩事都好多人出嚟幫口。」提到八月在紅館開騷，坤哥都會邀請對方捧場，不過身邊朋友都指明要坐前排，令他感到十分頭痛。問盤菜瑩子會否送花？她笑言：「送盆菜！（咁大盤？）細兜啲，（你似乎有所暗示？）哈哈，我冇留意喎。」

承諾個唱值回票價

有網民指演唱會公開發售的門票「黑洞」太多，發售的都是睇背脊座位，坤哥表示個騷開四面台，承諾會照顧四邊觀眾。至於靚位被扣起，他估計是被優先訂購了。對於外間批評他的演唱會是否不夠歌？他只希望買到飛入場的觀眾，都能夠睇到一個值回票價的演出。

此外，近日有指龔嘉欣正蜜運中，與富二代陳世俊秘密交往，又說兩人已進入同居階段。問坤哥可知道「家姐」有新戀情？他尷尬表示：「其實我哋好少談兒女私情，一向專心工作，我哋只會講夢想、講演技。（會唔會祝福佢？）了解下先，（報道話佢已登堂入室？）係咩？等我睇下報道先啦。」再問他會否送兩張演唱會飛畀嘉欣？他笑言會盡力安排，又說連日來每日20小時忙於工作和綵排個唱，所有報道都無暇理會。

採訪：Pauline

攝影：林良明

編輯：陳禮恒

設計：梁政敏