林海峰 紅館感言整喊彭羚

林海峰（Jan）棟篤笑《是但噏廣東話》前晚在紅館舉行尾場，向來比較含蓄的他，在謝幕時公開多謝已經離任商台的俞琤，還有摯親的老婆彭羚，搞到在台下睇騷的她亦感動到眼濕濕。

阿Jan去到最尾謝幕時，希望借觀眾的掌聲去多謝幾個人，其中一個是一直視為伯樂的俞琤，之後再多謝爸爸媽媽及填詞人林若寧，至於一向鮮有公開談感情事的他，也趁着未知能否再有機會開騷的這一晚多謝老婆彭羚。

感激阿葛一口答應演出

雖然阿Jan沒有提到老婆彭羚的名字，只是說：「其實好多人都會喺演唱會做呢啲嘢，我會覺得好『娘』，但係今日都要做。自己已經去到中年，好少表達呢啲嘢，好記得當時第一眼喺TVB化粧間見到呢個人就覺得『呢個人就係喇』，我覺得自己嘅決定冇錯，因為有佢先有我。」此時現場的射燈照向彭羚，她已眼泛淚光，更雙手掩面，阿Jan就笑謂：「唔知返到屋企佢會唔會話我，做乜唔提佢個名……其實佢唔係啲咁嘅人。」台上的阿Jan見記者不停向住老婆閃燈，立刻懇請大家不要再影，可見他對老婆相當保護。

完騷後，Jan在後台接受訪問，講到他在個騷談到香港民生話題會否感觸？他就說：「寫劇本時都係想大家笑下，我啲笑話其實都係淚水堆積出嚟，個騷入面有講到父母揸車時，要不斷播兒歌俾啲小朋友聽，呢啲都係朋友講畀我聽，我覺得好恐怖，而我自己就連續聽咗六年囉！」阿Jan又稱阿女都有來支持，但澄清頭場有報道指影到細女，其實是大女的同學，笑言自己有時都會認錯。

講到老婆喊，平時好少冧老婆？他笑謂：「唔係，有時都會做嘅，不過唔會喺幾萬人面前到做嘢，其實啲掌聲佢（太太）都有份嘅。」Jan重申個騷不單止屬於他一個人，除了家人、朋友、工作人員，還要多謝葛民輝：「當日打畀佢，佢都冇問日期就應承做呢個騷，原來撞正佢阿仔畢業禮。」

撰文：Pauline

編輯：林梓添

設計：梁政敏