星級暑期工

等到頸都長的暑假終於嚟喇！不少同學仔選擇吃喝玩樂，實行玩足兩個月；亦有人選擇搵暑期工，儲社會經驗之餘，又可賺錢買心頭好。一眾藝人亦曾有些過癮暑期工體驗，與大家分享難忘趣事。

周家怡 為黎明伴舞

十幾歲時，我覺得郭富城好型，加上好鍾意跳舞，所以去參加比賽做Dancer，跟星級排舞師High King學跳舞。不過我入行之後就冇見過偶像城城，反而幫黎明當年嘅新歌《DNA出錯》伴舞！當時我都有份出騷做演唱會，除咗Leon之外，仲有李克勤等等。每次開騷前，我哋一班Dancers都會偷偷睇下山頂有冇爆滿，感覺好得意，亦因為咁愛上咗表演。

王宗堯 做靚仔Sales

我喺外國讀書，但每年暑假都返香港搵工，多數都係寫字樓工，試過做會計、網頁設計、精算等等，但覺得最好玩都係做時裝店Sales，日日摺下牛仔褲，賣下衫咁，發現自己都係鍾意同人有互動嘅工作。

吳業坤 大隻清潔工

中五嗰陣，做過學校外判嘅清潔工人，要搬課室枱櫈、地板打蠟、掃地等等，所以減肥減得好勁，仲大隻咗。不過當時冇最低工資，每日得百零蚊收入，好彩包午餐，所以每日都好期待個飯盒，賺到錢就去買結他。

許廷鏗 牙醫好助手

中學放暑假，我喺Uncle間牙科診所做助手，但當時未有牙醫牌，所以唔能夠落手落腳幫手，都係喺側邊觀摩為主。起初以為牙醫呢行好污糟同厭惡，但原來好乾淨企理，又認識咗好多物料同儀器，雖然曾經整爛儀器，但好彩唔使賠，亦間接影響我大學選科時揀咗牙醫。

衛蘭 為食女廚神

我做過網吧廚師，都係炸下薯條、煮下公仔麵咁，但我成日忍唔到口偷食！做網吧仲要解答客人嘅上網問題，收入唔多，但非常之忙。另外，我曾經做婚禮歌手，試過有新娘聽完我唱歌太感動，仲要求我Encore！

撰文：李潔盈

編輯：林梓添

設計：梁政敏