藍精靈玩轉海港城

「藍精靈，十分勁」，呢句歌詞絕對係耳熟能詳，唔止一班藍精靈夠勁，海港城都好犀利，成功將佢哋帶咗嚟香港同大家見面，將「海港城‧美術館」變身「藍精靈‧十分勁」亞洲巡迴藝術展第一站，同時會展出作者Peyo 嘅 36幅珍貴原稿。

聽九龍倉置業執行董事凌緣庭（Yen）講，佢細個都有睇藍精靈卡通。Yen仲話，今次揀選藍精靈做展覽，就係睇中佢哋嘅粉絲層面夠闊，不論年齡、男女都有人鍾意佢，「卡通入面每個角色性格唔同，個個融洽相處，為大家帶來好多歡樂及正能量。」

今次成功將從未離開過比利時嘅原稿帶嚟香港，海港城嘅團隊花咗好多心思。Yen笑言，前前後後雙方花咗九個月時間商討先落實合作！展覽之外，海運大廈露天廣場已變身成巨型藍精靈村莊，大家可以走入六米高精靈屋，享受不同AR體驗。

海港城仲搵咗本地微模型藝術家，打造八個藍精靈1︰1漫畫經典場境！黛安仲知道，海港城會有期間限定店，發售香港特別版figure及日本歐洲版精品！

此外，講起今年零售業吹淡風，Yen話海港城推廣宣傳預算無減少，又指今年人流與去年比較，更有微升。