瑞典樹屋打工執Poo-Poo 視迷讚翠如女神唔怕捱世界

黃翠如早前拍攝的《反斗紅星冇暑假打工唔捱世界》前晚首播，翠如BB遠赴瑞典北部化身樹屋酒店房務員，更紆尊降貴在環保馬桶前執Poo-Poo（便便），觀眾Like爆女神好睇又貼地；有人卻嫌她手腳慢勁兼甩碌！

曾於會考考獲25分佳績的黃翠如，早年主持旅遊節目「響朵」，近年從收費電視轉戰無綫後卻專心拍劇，除了13年的兩輯《走過浮華大地》及前年的《走過足球聖地》後，已甚少在鏡頭前帶觀眾遊世界。不過，這位旅遊達人早前重操故業拍攝《反斗紅星冇暑假打工唔捱世界》，遠赴北歐的瑞典和芬蘭，體驗當地人的工作文化，並打足六份工。

上周楊明及袁偉豪到印度打工捱世界，今周輪到翠如BB出馬，她在第一集到訪瑞典北部被譽為世界十大不平凡酒店、只得六個房間的樹屋酒店，擔任房務員及廚師，其工作範圍除了要為客人準備三餐外，並要洗碗及執拾房間，全屬基層工作。

清潔阿姐吸21.5點收視

雖然貴為高材生兼知名藝人，但翠如BB在節目中幫手準備咖喱三文魚湯奉客，表現有板有眼。不過，當她從廚房攞湯出客廳時，卻不慎倒瀉，甚為狼狽。其後，翠如BB化身房務員，孭着厚重的床單、毛巾爬上位於樹上的樹屋執房，她更要清理便盤，在鏡頭前首度執Poo-Poo。然而，由於是環保馬桶，沖廁後糞便經燃燒變成灰燼，因此未算太重口味，翠如BB更拿起便盤到野外施肥，令觀眾大開眼界。

不少網友激讚女神化身基層小職員夠貼地，有口痕友卻狠批其工作簡單，卻顯得雞手鴨腳。至於昨晚節目，翠如BB轉戰奇臭無比的罐頭魚工廠，更親自落場切魚頭及內臟，以及嘗試臭魚的味道，絕對是味蕾大挑戰，而稍後她更會變身聖誕老人的助手。此外，前晚《打工唔捱世界》第一集平均收視錄得20.1點，最高為21.5點。

撰文：Steven、Pat

協力：Tina、Erica

編輯：黃寶恩

插圖：何樂

設計：Simon