紅館騷賣飛逾九成 坤哥預告着少啲布

吳業坤（坤哥）昨日為下月處男紅館騷舉行記者會。席上，他宣布已邀得王祖藍及張智霖做嘉賓。忙於拍劇及練歌綵排的坤哥，坦言沒時間練大隻，「惟有練體力，或者騷下內在美！」

坤哥個唱門票雖然昨日才正式公開發售，不過大會已宣布首日已賣出98％，有指主辦方扣起八成門票作內部認購，只餘小量門票作公開發售。坤哥回應說：「門票由公司安排，我都唔清楚，不過收到好多朋友信息話要訂飛，希望盡量滿足大家，但唔會加場。」

唔搵Aka做嘉賓

由於今次個唱開四面台，坤哥預告會跳舞。「我會郁下，好緊張，希望舞步加入我嘅元素。」提到前緋聞女友Aka（趙慧珊）所屬的Super Girls自薦做嘉賓伴舞，坤哥聞言即尷尬標汗：「唔好啦，我跳得咁差，唔好拉低人。」歌衫方面，坤哥笑言已吸取穿窄褲現形教訓，「再着窄啲？唔好，我驚大家掛住望，唔聽我唱歌，可能着少啲布啦。」屆時會否半裸曬肌？他笑說：「睇觀眾反應，如果全場叫我除衫，睇下到時有冇打底。」

採訪：李潔盈

攝影：Lego

編輯：林梓添

設計：Simon