黛安
黛安

7萬隻人手包裝 田馥甄fb曬新碟設計

發佈時間: 2016/07/07

7萬隻人手包裝 田馥甄fb曬新碟設計

歌迷有幾支持(Hebe)?呢位台灣天團組合S.H.E.成員自從單飛出唱片,成績有目共睹。好似新碟《日常》即將推出,就算唱片公司同佢話保持神秘,唔講新碟內容係咩,預購量都達7萬!早前發布會,Hebe仲開玩笑說,咁神秘係為咗測試歌迷會否盲從。

等了又等,原本新唱片星期五出爐,唱片公司華研國際突然宣布,延遲發行日到下星期三。粉絲完全無嬲嬲豬,因為延遲原因係每隻碟都「全手工包裝」,咁有心思,粉絲梗係冧到爆。Hebe仲好貼心,昨日係fb專頁貼文,畀大家睇真啲新碟個餡,仲加埋個hashtag話「我不是小編我是明星本人不要再懷疑了喔」,好得意!

今次設計者都好有名,係台灣設計師聶永真同佢嘅團隊,唔少網民都讚好靚,話好值得期待!聶永真為唔少人氣歌手設計過唱片,好似周杰倫、張惠妹等等,佢為林宥嘉《感官/世界》做嘅設計拎埋第21屆金曲獎最佳專輯包裝獎𠻹!

撰文: 黛安 消息特靈八卦公關
欄名: 八卦名利場