翠如送衫男友冇件啱

向來慳家見稱的黃翠如，昨日聯同朱千雪、馮允謙穿上環保物料製成的衣服行騷，翠如BB自爆屋企五姊妹經常一件衫五個人穿，加上最細的妹妹懂得縫衣，一年慳回不少置裝費。

黃翠如穿上一襲由香港設計學院學生以回收膠樽及物料製成的裙，為免弄破物料，結果她全程都不敢坐，翠如笑言：「花都係由膠樽物料製成，試過邊行邊跌晒落地。」記者提議她將來結婚可交由妹妹設計婚紗，她認為是好主意，最重要是由摯親設計，特別sweet。

平日會否買衫給男友蕭正楠？翠如即扁扁嘴謂：「試過旅行期間，我哋玩遊戲，以最低價錢為對方揀衫，結果大家揀嘅都唔合對方心意，最後要自己重新買過。」朱千雪剛完成碩士課程，翠如亦有計劃修讀哲學，要是真的重返校園，男友豈不是又繼續等，問翠如會否考慮先訂婚？她表示：「呢一刻未諗到咁長遠，女仔唔好主動講，太傻喇！佢（Edwin）嘅工作都排到明年。（學其他藝人奉子成婚？）好遠喎！呢個方向，我希望有計劃去做，要step by step。」

千雪復出

早前停工九個月的朱千雪，近日正式復工，她笑言：「都要賺番學費㗎。」但拍劇仍有待公司安排。談到身上的拖尾裙，她說首次穿上環保物料服飾，穿着時不算困難，反而擔心行路時裙尾被踩爛，所以要好小心。

採訪：Pauline

攝影：林良明

編輯：陳禮恒

設計：梁政敏