張智霖的寵物故事

在張智霖（Chilam）成長中，狗佔了很重要位置。從八歲、人生中第一隻寵物金毛尋回犬開始與寵物結緣。其後，更養過貓、雀、龜及魚。生活不離動物，工作上也一樣。最近，他為剛上映的卡通電影《Pet Pet當家》聲演主角阿麥，就是一隻小狗。

Chilam養過很多種動物，但坦言最愛還是貓與狗，因為在牠們身上深切體會到：人性。尤其是狗。「在澳洲留學時養咗兩隻Boxer，後來要返香港，所以就同佢哋講我要走喇。到我走時，佢哋真係會知，伏喺門口好耐，望住你執行李，到拖行李篋時又會捉住你，令我覺得：『點解你會知道我走？』動物，真係好似屋企人一樣。」

訓練魔童的愛心

分離，不止一次。曾因工作太忙，將家裏的貓送給能照顧的朋友，那種難過，至今仍然記得。「送佢哋走時就好似送咗個仔女畀人，好傷心好難過。」但最難過的一次，就是「阿權」走了。「試過買咗隻Golden Retriever（阿權），好得意，但養咗幾日後，佢突然好唔舒服，立即去睇獸醫，過多一日半日就死咗，當時仲係Call機年代，就喺Call機度留：『阿權已死』，好崩潰，呢啲都係一啲好唔開心的經歷。（被嚇怕？）會，養之前會諗清楚自己有冇時間，呢個最緊要。」

對待寵物，需要有責任感及無限愛心，所以在囝囝魔童七歲時，Chilam就帶了狗狗阿金回家，是陪伴、也是訓練。「佢同動物相處後就會知道，呢個世界唔只得你一個物種，所以對待所有生物都要公平同有愛心。」魔童要養寵物，Chilam通常來者不拒，但也要過埋太太袁詠儀（靚靚）嗰關。「老婆就因為貓會令到我哋鼻敏感而拒絕，而家都會睇下有咩辦法養，又怕而家住的地方有騎樓會有危險，所以要睇情況。」除了貓，有種動物，靚靚不能接受。「我老婆好驚雀，（如果魔童想養鸚鵡？）呢樣一定唔得！我諗除咗狗，最大機會都係養缸魚，哈哈！」

（轉載自《U Magazine》）

整理：林梓添

設計：Alex