【聲明】港生活網站並無進行電話推廣活動

岳少帶隊波爾多宣傳香港 廚魔出招 鵝肝配竹葉青

發佈時間: 2016/07/04

介紹中國傳統酒,除咗叫大家飲啖先,仲有咩特別方法?人稱廚魔嘅Bo Innovation米芝蓮三星廚Alvin Leung有新嘗試,就係拎咗個香水樽出嚟,噴香水咁,等大家用味覺感受下「竹葉青」,認真有諗頭。

搵得星級大廚出馬,當然唔係普通晚宴,而係兩年一度波爾多葡萄酒節第一擊!聽旅發局公關姊妹講,廚魔身負重任,要為紅酒節開鑼打頭陣,喺開幕日市長午宴同法國廚師拍住上,打造「中法」菜單,招待各國來賓。現場嘉賓除咗用味覺品嘗Alvin出品嘅燒鵝肝配竹葉青酒,仲用鼻尖認識咗竹葉青獨特嘅味道,個個都話呢個組合好與別不同!

講番葡萄酒節,活動每次都吸引唔少當地同世界各地遊客,今年係第十屆,商經局常秘容偉雄、旅發局主席林建岳(岳少)帶隊去波爾多為香港宣傳。今年香港館主題係「中×西」,要為香港文化同美食全新演繹,突出香港獨有「傳統×時尚」對比。會場內,除咗旅發局打造嘅7米高廣東傳統大戲棚,仲有Little Bao(小包包)主理人May Chow獨創香港小食,吸引大批入場遊客圍觀。

邀酒莊再參與美酒佳餚巡禮

姊妹仲話,旅發局同波爾多著名酒莊一向友好,岳少都趁住今次活動與Lafite Rothschild同Mouton Rothschild等酒莊代表見面,邀請他們出席10月喺香港舉行嘅美酒佳餚巡禮。黛安仲八卦到,今年美酒佳餚巡禮,起碼有44個攤位來自波爾多酒區,相信會係場內以酒區計數量最多。

撰文: 黛安 消息特靈八卦公關
欄名: 八卦名利場