【聲明】港生活網站並無進行電話推廣活動

前日咪吸咗塵囉

發佈時間: 2016/06/24

三年前密謀「退休」,身邊朋友戰友無一個未聽過,個個知我嚮往自由,渴望做前人未做過嘅創作,為求突破,可以隨時放棄手頭擁有。

其實,除咗有啲做生意天份,如假包換廢青一個,胸無大志,是是旦旦,豉油撈飯,有得懶就懶,有得玩就玩,唔明班所謂「成功人士」追求啲乜,用一生健康快樂,換取短暫金錢地位,值得嗎?我無咁傻。

對我嚟講,打工本質一啲都唔好玩,只係無得揀,時時幻想「退休」,夜晚幾點瞓都得,朝早自然醒就得,行街睇戲淋花刨書煲美劇,齋hea無所事事,幾爽呀,點知呢個係童話故事,現實原來唔係咁,打理一頭家,仲辛苦過返工。

原因老婆大人認為,自己屋企自己打理,唔鍾意屋企多個外人,無請菲律賓工人,以前返工管幾百人,今日全職照顧三個男人,我於心不忍,平日執頭執尾,洗衫晾衫摺衫燙衫,洗碗抌垃圾,幾易呀,呢啲係所有男人放工之後應負嘅責任。

家頭細務,婆一份公一份,我明;唔請家庭傭工,唔畀開冷氣吸塵,慳慳埋埋,可以選擇提早「退休」,我都明。但做少啲家務,又唔係好污糟,又無人睇到,咁勤力做乜,我就唔係好明。

「老公,一陣間吸塵。」

「老婆,前日咪吸咗塵囉。」

「你噚日食飯,今日又食。」「……」

「吸完塵,換埋幾張床單。」「唔係啩。」

「做唔做?你唔做,我做。」「……」

「退休」為時短暫,大人係嗡嗡嗡勤力小蜜蜂,或者睇唔慣呢隻懶蟲,用心良苦,唔講我都明,但唔會咁輕易屈服返番工。

(本欄逢周五刊登)

撰文: 莊偉忠 崇尚反璞歸真的營商信念,以人為本的CEO
欄名: 有種CEO叫做莊