Ivana爆小方遇靈異事件

方力申（小方）與王菀之（Ivana）前晚在銅鑼灣出席新片《綁架丁丁當》首映禮，有份演出的關寶慧在村屋拍攝時遇上靈異怪事，小方和Ivana聞言即笑指他們身上最靈異就是易肥易瘦！

方力申與王菀之在大熱天時穿上秋裝，兩人笑稱背脊已流晒汗。小方賣口乖說今次與金像女配角合作十分開心，其實兩人是首次合作，感覺卻一見如故。小方早前買飛捧場睇Ivana演出舞台劇，二人表示音樂上合作機會不大，倘若電影票房好，或考慮改編成舞台劇再合作。

談到關寶慧拍外景時遇過靈異事件，Ivana即搞笑表示：「我都親眼見到對拖鞋一大一細，會唔會係熱得滯融咗？呢件事真係解釋唔到。」方力申則笑言：「解釋到，係佢時運低，我哋時運高。」

體重大上大落

不過，小力笑談他的靈異事件，是拍攝時體重大上大落，事關開工時重了15磅，之後又輕了15磅，及後又再重15磅。他解釋因為在戲中要騷肌，為拍攝該場戲前數天已開始節食，Ivana表示：「佢專食烚嘢，日日見佢食甘筍，不過幾日之內可以見到啲肌肉由鬆變實，變咗大隻仔。你知唔知嗰幾日邊個幫你搞掂啲飯盒？因為每日都將飯盒放喺我隔籬，所以（我）咪Keep住肥胖狀態囉！」

此外，小方與鄧麗欣（Stephy）分手三個月，有指小方藉詞探望與Stephy住同屋苑的張繼聰，其實想見Stephy一面。小方強調不是真的，他直言：「我沒有去探過她。」

採訪：Pauline

攝影：林良明

編輯：陳禮恒

設計：鄧俊明