當年合作拍《人在邊緣》 陳法蓉後悔冇追劉青雲

前港姐陳法蓉、莊思明等昨日出席慧妍雅集活動，陳法蓉提到近日無綫重播她與黎明、劉青雲合作的劇集《人在邊緣》，即自爆後悔當年沒有主動追求劉青雲，「佢係個好男人，可惜佢當時有女友，仲係我嘅好朋友。」

陳法蓉早前拍無綫新劇《賭城群英會》，她自言十分開心與謝賢（四哥）合作：「四哥好鬼有型，成日叫我哋估下佢條呔幾錢。」有指同劇的何浩文力追麥明詩，陳法蓉自言不察覺：「放工大家會一齊食飯，我唔覺得佢哋有嘢，我有問過麥明詩拍劇辛唔辛苦，不過佢好叻，適應力好強。」另外，提到李珊珊宣布拍賣港姐冠軍后冠作慈善用途，她自爆自己當年的后冠原來是「假嘢」，「過年過節我會拎（后冠）畀小朋友戴下，但有次搬屋已經整唔見。」

莊思明未諗結婚

同場的莊思明早前宣布與楊明蜜運，問她可有結婚計劃？她笑指言之尚早，「太快啦，最緊要確保兩個人生活開心，要相處耐啲去了解。」不過，她自言很喜歡小朋友，將來婚後希望生兩個仔女。

撰文：李潔盈

攝影：Lego

編輯：林梓添

設計：nc