【聲明】港生活網站並無進行電話推廣活動

馬會牽「紅」綫 港青明年激鬥小曼聯

發佈時間: 2016/06/23

曼聯青訓出哂名,三冠王年代嘅「七小福」碧咸、傑斯等,全部嚟自自家青訓產品,可以話係超級球星搖籃。收到喜訊,馬會噚日公布同曼聯未來4年合作,成為社區足球合作夥伴,新計劃最吸引莫過於曼聯青年軍出年7月來港,同港隊青年軍踢友誼賽,仲有特別為兩地年輕球員而設足球同交流活動。姊妹話,曼聯青年軍可以話係「未來碧咸」、「未來傑斯」,有機會同呢班超級球星鬥波,對於香港青少年球員,絕對係黃金機會。聽講,到時一星期交流活動,公眾都有機會參與,總之都係嗰句,「密切留意官方公布」,同埋齊齊為一眾未來球星打氣!

撰文: 黛安 消息特靈八卦公關
欄名: 八卦名利場