民生90周年校慶前奏 莊偉茵兩公婆私房菜宴校友

民生書院90周年校慶，校友們自發返母校幫手舉辦連串活動，包括中電企業發展總裁莊偉茵（Qunice）。前晚為校慶做公關嘅Qunice，同民生校長陳嫣虹、校董會主席黃莉莉、校慶籌委會主席張經略，一齊宴請傳媒界好友聚餐，地點揀咗佢老公黃楚耀（Adam）嘅私房菜。聽住佢哋分享兒時回憶，全晚笑聲不斷，好似預演校慶晚宴咁。專欄作家查小欣講起，自己讀書時係運動健將，香港電視網絡主席王維基就話，佢係戲劇組㗎！

陳校長笑住講起12年前加入民生，渡過80周年，轉眼迎來90周年，黛安同佢講「起碼要做到100周年」！佢笑一笑，講起「光與生命」係民生校訓之一，亦係今年主題，自己同老師都係用呢個角度教導學生。另外，校慶重頭戲仲有星期日嘅晚宴，超過1,200位校友出席，相信大家都好期待聽到彭羚唱歌，黛安係度預祝晚宴成功！