銅鑼灣世貿打造膠樽回收站

踏入暑假，各大商場開始換布置，銅鑼灣wtc more世貿中心公關就話，今個暑假搞搞新意思，要做環保做主題，打造環保元素結合運動文化同時尚潮流嘅藝術展覽，送上一個「Eco Summer」！

大型裝置走綠色路綫之餘，畀個機會大家齊齊為環保出番分力，7月6日開始，世貿會有大型「環保膠樽回收站」，仲會同環保團體「綠惜地球」合作，向公眾展示膠樽回收後循環再造過程。

商場又邀請咗著名藝術家Danielle Ehrlich同Judy Rom親臨香港推出首個個人展覽，合作設計兩個用膠樽同環保物料製作嘅運動主題藝術品，即係圖中嘅大波鞋同大球拍。