摘星意菜×大師級屠夫 打造全牛盛宴

屠夫同藝術家可以係同一個人！來自意大利Panzano「屠夫大師」Dario Cecchini係一位屠夫兼表演者。中環置地廣場星級意大利餐廳CIAK - In The Kitchen，最近派出CIAK團隊同Cecchini合作，一連兩晚打造「Nose to Tail」（首尾相連的菜單）嘅特色菜單。

聽公關姊妹講，Cecchini係家族生意第8代繼承人，承傳咗意大利傳統屠宰藝術，佢深信屠宰工作係一門古老藝術，而為咗表達對動物生命嘅尊重，牛肉每一部分都要用心製作。從Cecchini嘅理念，令人對屠宰行業有另一番體會。姊妹仲話，今次盛宴個名咁特別，係因為一共12道菜用咗牛嘅唔同部位，「首尾相連好似由頭到尾咁嘅意思」。自家製牛肉湯Brodo、Chianti區傳統手工切割牛肉他他、Fiorentina風格炭燒丁骨牛排等，聽菜名都覺得吸引。

講番CIAK - In The Kitchen，除咗係旅發局主席林建岳（岳少）旗下摘星餐廳之一，威水史包括前年開業未夠一年已經拎到米芝蓮一星。品牌最近仲有新搞作，就係進駐太古城，開旗下首間分店CIAK–All Day Italian，菜式由麵包、薄餅、到意大利自家製肉腸都有。

聽講原本助陣中環CIAK嘅米芝蓮三星大廚BOMBANA Umberto，為太古城分店花咗唔少心思，做埋擔任廚藝指導，大家幫襯時記得留意BOMBANA「高度推薦」嘅菜譜！