【聲明】港生活網站並無進行電話推廣活動

我的「廣告」生涯

發佈時間: 2016/06/17

諗都無諗過,呢頭「退休」收爐,嗰頭有人搵我拍廣告開工。呢頭無固定收入,嗰頭有外快幫補。以前秘撈拍廣告唔可以,而家明撈想點就點,仲可以角色扮演,扮celebrity,幾英呀,淨係唔慣出街畀人指指點點,做乜都梗有代價。

更加諗唔到,無樣無身材,成個宅佬暖男,但形象幾正面,幾有觀眾緣,廣告出街,反應幾好,阿明話齋:「鍾意就鍾意,唔鍾意就唔鍾意,學咩人講L-I-K-E」,有人噓有人捧場,正常過正常,預咗,但唔好戇居居評價:「用自己名氣賣廣告搵真錢,變咗,商業化咗,好失望。」傻的嗎?

點解用自己才華,私下賣畀機構賺薪水就得,美其名上進貢獻事業;點解用自己形象,公開賣廣告賺錢,就係銅臭庸俗虛假。最莫名其妙,除非有關慈善文化,就算純粹分享,見人唔覺意講咗影咗一個牌子,面部肌肉就不受控制𠴕嘴𠴕舌,硬係要影射廣告宣傳,大佬呀,使唔使咁食古不化,笑死朕。

做人又好,賣廣告又好,光明磊落,明刀明槍,使乜轉彎抹角,只要有內容有品味有特色,用累積嘅信譽,將相信嘅贊同嘅,講清講楚,有乜唔妥,咁樣同推薦書本餐廳旅遊地點畀朋友知,有乜分別喎。

係咪失望抑或食古不化,唔關我事,唔會影響我延續「廣告」生涯嘅打算,我淨係知,做人貪玩啲反斗啲,鬥心大啲,做人正面啲寬容啲,快樂多啲。諗到偶然可以企喺幕前,享受片刻虛榮,滿足老婆大人吩咐:「可以退休,唔可以唔做嘢」。爽!

(本欄逢周五刊登)

撰文: 莊偉忠 崇尚反璞歸真的營商信念,以人為本的CEO
欄名: 有種CEO叫做莊