DJ Donald遇襲扑穿頭 阿倫無意請保鑣

商台DJ Donald（唐劍康）前晚與同事在九龍城晚飯時遇襲，經診療後昨晨出院。事件被指與一名任職的士司機的瘋狂Fans，追求DJ麻利亞不遂有關。「校長」譚詠麟昨日在活動上直言「得人驚」，只好提醒大家出入小心。

DJ Donald、Colin及商台同事Jacky前晚遭到襲擊，其後爆出DJ麻利亞近期受狂迷滋擾。譚詠麟昨午出席《耆義旅程》啟動禮，談及此事時坦言：「好得人驚，我有睇報道，話商台一直都有留意嗰個人（的士司機），始終你在明佢在暗，無得防，惟有小心啲。」近日好像發生不少同類事件，藝人似乎防不勝防，問阿倫會否請保鑣？豈料他笑言：「我咪保安囉！」

唔知黎明個腦諗咩

阿倫擔任活動榮譽大使，幫助腦退化人士解決日常生活遇到的困難，有指他獲上屆榮譽大使徐小鳳委任，阿倫即笑言：「唔記得自己歲數嘅可以搵我，哈哈！亂噏嘢代表可以搵黎明，因為我都唔知佢個腦諗咩！」他戲言可以考慮引薦黎明做下屆大使。

阿倫憶起其父親譚江柏病逝前都出現過腦退化症狀：「佢試過喺屋企燒銀紙，大小面額都有，工人見到嚇到傻。有次同佢出街走失咗，揸車搵咗成晚都搵唔到，好彩有朋友咁啱見到，知道係譚伯即刻通知我。」阿倫笑言自己記性還好，因為平日會刨馬經，有助腦筋靈活。

採訪：Pauline

攝影：Lego

編輯：陳禮恒

設計：鄧俊明