【聲明】港生活網站並無進行電話推廣活動

唔剃鬚的第一天

發佈時間: 2016/06/14

好多人覺得,返工即係上戰場,唔一定要身光頸靚,但最好望落精神爽利,容光煥發,女嘅濃粧艷抹或者淡掃蛾眉,男嘅乾淨企理,千祈唔好留鬍鬚。

我唔知女人每日化粧,麻唔麻煩,嘥唔嘥時間,定係樂在其中,但每朝剃鬚,好鬼死討厭,一日唔剃,仲可以遮遮掩掩,兩日唔剃,成個失敗商人咁款,留鬚好難捱過尷尷尬尬嘅第一個月,迫於無奈,朝朝拎住鬚刨,刨呀刨,刨咗三十幾年,浪費寶貴光陰,人又唔見叻咗,風格唔見突出咗。

返工一向我行我素,便服制服西服,選擇舒服,曾經對上司咁講:「我着乜嘢衫,都唔會影響我嘅工作能力。」幾勇呀,但講到鬍鬚,自己都覺得自己老套,可能自小畀老竇老母教導,鬍鬚佬即使係虯髯客,都係賊,屋企唔畀留鬚,中學唔准留鬚,大學無乜人留鬚,出嚟做嘢,鬍鬚佬望落似鹹濕佬,好似唔係咁好。

香港地,跟大隊最安全,人人習慣規行矩步,唔敢特立獨行,更加唔敢破舊立新創作,或者我想多咗,鬍鬚只係其中一個潛規則嘅例子,有破壞無建設。四年幾前,貪玩留咗六個月鬍鬚,最後阿媽下令剃鬚,老婆大人話污糟,同事話破壞形象,原來留鬚剃鬚嘥唔嘥時間,根本唔係問題,真正嘅關鍵,係敢唔敢破格,力排眾議堅持到底嘅決心。

終於等到五月六日,「退休」第一日,就算有客請食farewell飯,堅決唔剃鬚,即刻少咗份身不由己嘅束縛,多番份有得選擇嘅自由奔放,感覺零舍唔同咗,人都好似型咗man咗,唔容易畀人認得出,搞到我好想返番工再創作,誇張囉,爽!

撰文: 莊偉忠 崇尚反璞歸真的營商信念,以人為本的CEO
欄名: 有種CEO叫做莊