黛安
黛安

《晴報》星級派報員 莊偉忠聽日同大家Selfie

發佈時間: 2016/06/14

《晴報》星級派報員 莊偉忠聽日同大家Selfie

上星期講過,莊偉忠噚日開始喺《晴報》寫專欄,粉絲都話期待,仲有唔少粉絲去佢Facebook專頁留言表示支持。除咗留言打氣,有買咗佢本新書《不離地CEO》嘅粉絲話,期待莊偉忠舉辦多幾次簽書會,等大家可以同佢selfie。向來同粉絲好多互動嘅莊偉忠就回覆,見到佢就有得selfie!點先見到?聽日有機會啦,朝早8點3開始,莊偉忠會去中環IFC來往恒生總行行人天橋派報點派報紙。計黛安話,派報都係其次,畀機會大家「野生捕獲」佢最重要,姊妹話,莊生歡迎大家搵佢selfie同埋傾下偈!

講番莊偉忠個專欄,欄名夠晒有型——「有種CEO叫做莊」,今個星期一連五日見報,之後逢星期五同大家見面。睇莊偉忠fb就知,佢嘅退休生活忙過返工,又拍廣告、又去派雪糕,總之就多姿多彩,點解開壇寫文?噚日專欄入面有提到,「一字記之曰『情』」,呢位CEO點止唔離地,仲有情有義𠻹,難怪粉絲咁鍾意!

撰文: 黛安 消息特靈八卦公關
欄名: 八卦名利場