【聲明】港生活網站並無進行電話推廣活動

恒隆陳南祿撑美食車 帶隊家樂坊歎星級漢堡

發佈時間: 2016/06/08

街頭小食令人回味,米芝蓮仲推出街頭小食榜,記得《晴報》都訪問過上榜嘅20幾間食店,好似出名用乾式熟成至少30日嘅澳洲有機穀飼牛做漢堡嘅The Butchers Club Burger,吸引唔少人慕名到灣仔品嘗。

收到恒隆姊妹好消息,依家去恒隆旗下旺角家樂坊都食到好味漢堡,因為品牌美食車Black Betty駕到!恒隆地產董事總經理陳南祿(Philip)噚日又去家樂坊捧場,The Butchers Club Burger董事總經理Jonathan Glover都親自介紹鎮店招牌美食。

帶埋一班管理層去食招牌漢堡、家樂坊美食車限定嘅Hentai炸薯條之外,Philip仲親自試下,喺改裝過嘅美食車車身斟杯冰凍啤酒,呢個下午茶時間認真夠梳乎!

唔講唔知,原來Philip偶爾會食漢堡當正餐,仲話「漢堡好唔好食,最重要係牛肉質素」,唔知星級漢堡打唔打動到對美食好有要求嘅佢呢?第一次試Butchers Club出品,Philip一口氣食哂成個,仲坐埋喺美食車旁邊歎Hentai薯條配啤酒,行動證明一切,你估下有幾好味?

撰文: 黛安 消息特靈八卦公關
欄名: 八卦名利場