何韻詩開騷唔成餘波未了 祖兒：有啲無奈

容祖兒前晚與音樂人馮翰銘（Alex）在會展舉行《拉闊音樂會》，祖兒開騷，男友劉浩龍（師兄）乖乖捧場。提到何韻詩與化粧品牌合作的音樂活動取消，祖兒不欲多言，只表示：「有啲無奈。」

某化粧品牌突取消本月19日與何韻詩合作的小型音樂會，事件引起軒然大波，容祖兒在完騷後表示也有留意新聞：「呢個騷我知我講任何嘢，焦點都會飛咗去佢（阿詩）度，所以我簡單講一句，作為朋友，佢冇咗個表演機會好可惜，有啲無奈。」

提到前晚的《拉闊音樂會》，祖兒表示準備得很趕急，因為之前要在澳門與克勤開騷，返港後才開始練合唱歌，她說：「對我而言，年紀有番咁上下，記歌詞記到前一晚三點先有得瞓。」祖兒又笑稱認識馮翰銘之後才知對方不是同志，仲有老婆及兒子，Alex立刻澄清：「我老婆識我嗰時都以為我係『攣』。」

36歲慶生等師兄安排

此外，祖兒表示起初不知道男友劉浩龍有到場，男友都知她辛苦，還陪她一齊練歌。而本月16日是祖兒的36歲生日，她表示要等人安排慶生節目，卻記得當日應該要在北京工作。她說：「黃偉文與黃耀明應該會嚟一齊食餐飯，大家都係雙子座。（同男友私下慶祝？）私下嘅嘢就私下解決啦，等安排。」不過，祖兒似乎知道自己講得太多，她笑稱開完騷太High容易講錯說話。

日前，祖兒宣布成立慈善基金，並說心願是希望幫到有需要的人。問到師兄會否幫手，祖兒即謂：「我細佬都唔收錢負責攝影，我諗擔擔抬抬做苦力，佢（劉浩龍）都要幫下手囉。」

撰文：Pauline

編輯：陳禮恒

設計：nc