Instagram食物相 贏環球美食攝影之旅

大家用Instagram（ig）「曬」旅行相、食物相試得多，有無諗過post相「呃Like」之餘，有機會影到去米芝蓮餐廳先？Netflix出品飲食紀錄片《主廚的餐桌》（Chef's Table）最近播出，好受foodie歡迎，主人家見聲勢咁好，已經準備好要開第二輯。

Netflix仲諗住邀請亞洲食迷參加ig攝影家招募活動，等大家將「相機食先」精神發揚光大。6月27日前，喺ig追蹤「NetflixHK」，再上載誘人美食照片兼加番hashtag「#MyChefsTable」就有機會㗎啦。成為《主廚的餐桌》ig攝影家，就可以去泰國、巴西、斯洛文尼亞、墨西哥同美國，跟製作團隊深入《主廚的餐桌》第二季介紹嘅六間米芝蓮餐廳，親自品嘗每道色香味俱全菜式，再用鏡頭捕捉主廚創作美食動人一刻！

究竟咩風格嘅相先夠吸引，近鏡定top shot好睇啲，上官方ig睇到佢哋post咗六張本周精選圖片，大家不妨睇吓人哋點影，知己知彼先得嘛。