周六日連播兩集 視迷讚高潮位現曙光 《琅琊榜》劇情緊湊冇廁所位

內地神劇《琅琊榜》在港已播映三星期，惜未能掀起熱潮，無綫自前晚起，逢周六、日連播兩集冀盡快將該劇煲起。前晚第18及19集，劇情講述「寧國侯」謝玉在府中大開殺戒，執意剷除卓莊主、梅長蘇及蒙大統領一幕，竟掀起劇集首個高潮，不少視迷激讚劇情緊湊冇廁所位；有人卻嫌拖拉太長節奏慢。

無綫自上月中播出紅爆內地的良心劇《琅琊榜》後，收視至今竟未見起色。上周三撞正J2直播跑夜馬，該劇曾低見15.8點，令各界譁然。無綫有見及此，上周四宣布逢周六、日一氣呵成每晚連播兩集，期望加快劇集進度，挽救低迷收視。

《琅琊榜》今日踏入第四周，劇情亦步入白熱化階段。前晚周六首度播足兩集，劇情亦正式入肉。當晚「寧國侯」謝玉為兒子景睿舉行生日宴，梅長蘇布局大鬧寧國侯府的一段動作及鬥智鬥力場面，令觀眾拍案叫絕。兩幫人馬在侯府內對峙，譽王則領兵在府外靜候時機出手營救。突然，宮羽竟爆出謝玉是其殺父仇人，深謀遠慮的謝玉動員全府將士與巡防營的兵馬誓要把卓莊主、梅長蘇及宮羽一干人等趕盡殺絕。

高潮迭起贏口碑

前晚的劇情驚心動魄，精采度爆燈，原本劣評如潮的《琅琊榜》一夜間贏盡口碑，播出至今罕有地獲香港觀眾派Like，不少人高呼完全冇廁所位，仲話睇到個心離一離；不過，有口痕友卻嫌劇本推進得慢，眾人口水多多，搞足半個鐘仍未大打出手。

事實上，該劇在港播映以來負評不絕，除了由許廷鏗及吳若希唱的主題曲及片尾曲趕客外，廣東話配音亦被批不夠傳神，幸好現在劇集播至中段，終獲正評，惟未知能否助收視起死回生。阿Bob（林盛斌）前晚亦乘機在fb呻自己的吸引力不及《琅琊榜》，又上載家人在客廳追睇《琅》劇的照片，並留言：「所有我有份節目，劇集、電影，佢哋都冇睇。我諗《琅琊榜》應該係幾好睇嘅……」

撰文：Steven、Pat

協力：Tina、陳子楠

編輯：黃寶恩

插圖：何樂

設計：梁政敏