黛安
黛安

SK-II搵麥浚龍拍片 分享「改寫命運」

發佈時間: 2016/06/03

SK-II搵麥浚龍拍片 分享「改寫命運」

護膚品牌SK-II,女士唔會陌生,提起品牌代言人更加好熟悉。最令人驚喜係品牌搵麥浚龍(Juno)拍片,宣傳理念「#changedestiny」。喺Juno嘅facebook專頁見到短片,唔睇到最尾都唔發現,竟然係SK-II出品。記憶中,品牌第一次搵男士拍片做宣傳,對一個target女士嘅護膚品牌嚟講,絕對係大膽作風。

網上宣傳3個必備元素

同SK-II公關姊妹傾開,原來大膽作風源於不一樣嘅諗法,「今時今日做宣傳,驚喜同故事內容好重要」。網絡世界瞬息萬變,致勝之道係咩?姊妹話,「大家都未必有winning formula,不過有三個元素好重要:合適嘅KOL、強而有力嘅故事內容同啱嘅宣傳平台。今次搵Juno,有晒以下三個元素。」唔講唔知,品牌今次連script(對白)都無寫畀Juno,「完全係佢自己嘅故事」,Juno慢慢從初入行講起,18歲入行、第一年參加頒獎禮,觀眾帶畀佢嘅只有噓聲,一句「觀眾想我死一樣」,聽到有少少心酸。諗一諗近年嘅佢,電影作品有《殭屍》、唱歌有《羅生門》等,堅持我行我素嘅佢,成就咗改寫命運嘅故事,睇完片明白點解品牌會搵佢。

近年SK-II嘅廣告唔只講神仙水幾有效,反而投放多咗資源係品牌形象,「想話畀大家知,SK-II改變嘅唔止係你嘅肌膚,『#changedestiny』呢個主題更想帶出一個信息,就係人生都可以改變。」

撰文: 黛安 消息特靈八卦公關
欄名: 八卦名利場