微博秒拍聯手直播 互動兼送禮

喺社交媒體平台直播做live，已經成為潮流，收到消息，新浪微博同秒拍宣布，移動直播App「一直播」正式上綫，合作殺入直播戰場。新App除咗係獨立直播APP，仲有新浪微博直播功能，除咗玩live，仲可以同觀眾互動同畀錢送禮。

今次新服務仲會主打明星直播，黃曉明、周迅、薛凱琪、張智霖、吳鎮宇、應采兒等一早成為「一直播」用家，最重要係微博粉絲唔使額外裝新App，就可以喺微博入面以直播形式同明星互動。

之前韓國男神宋仲基舉行中國粉絲見面會，都直播咗17分鐘，短短時間已經有737.5萬粉絲觀看過，最高同時綫上人數高達182.7萬人，畀Like次數去到3,712.2萬次。唔怪得新浪微博CEO王高飛會話，直播係社交網絡嘅未來啦！