《G-1》郭思琳中途退出 決賽爛尾 視迷嘲唐紫睿符碌奪金腰帶

ViuTV真人騷《G-1格鬥會》前晚告終，結果郭思琳於冠軍戰因傷放棄餘下回合，大會宣布唐紫睿（Hazel）成為王者。網民鬧爆賽事尾聲個個傷，直指Hazel勝之不武。她對負評處之泰然，揚言摘下金腰帶兼成功轉型當打女已達到目標，無意衞冕下季賽事。

ViuTV從四月初啟播至今，女子MMA真人騷《G-1格鬥會》成為該免費頻道具話題性節目之一。賽事集合歌手、模及運動員等共八位女生參戰。總決賽前夕，戰績兩勝一負的Hazel原本與郭思琳打復活賽，但本來三戰三勝的鄧穎芝，在總決賽前因傷退出，造就復活賽「升呢」變相冠軍戰。

前晚播出最後一集，帶傷上陣的思琳在首兩回合賽事以六分領先，可惜她傷及右手舊患，在第三回合前決定棄權。換言之，將金腰帶拱手讓予Hazel，同時令Hazel贏得三萬冠軍獎金、健身會所合約及電影合約。不少口痕友狠批賽事尾段個個傷，搞到節目爛尾收場；有人則力撑Hazel打出功架，勝出實至名歸。

自掏腰包十幾萬療傷

本報昨晚聯絡到Hazel，對於網友的口誅筆伐，她表現豁達：「我一路打都好大壓力，就算面對網上好多抨擊，我都抱平常心，只望一手將學到的技術畀觀眾睇，唔想八個女仔好似街巿打交咁！」對於被轟勝之不武，有提議押後比賽等大家療傷，Hazel續稱：「我在第二回合結束也令思琳投降，起碼交咗功課。我唔知道如期作賽都有錯，自己確實有工作在身，手停口停。」

Hazel又指ViuTV有找她拍第二季，但下月要開戲，年尾則為《蔡李佛》開工，因此無意衞冕。她苦笑道：「冠軍獎金cover唔到我為今次節目嘅付出，睇醫生都花咗十幾萬，自己又唔似郭思琳有贊助！」Hazel又指經過《G-1格鬥會》後成功轉型，摘下金腰帶亦達到賽前目標。

協力：Crystal

撰文：Steven、Pat

編輯：陳禮恒

插圖：何樂

設計：鄧俊明