黛安
黛安

名人扮海洋生物撑保育 宣傳7月2日賣旗日

發佈時間: 2016/05/16

名人扮海洋生物撑保育 宣傳7月2日賣旗日

香港海洋公園保育基金兩年前拍攝「為海洋發聲」宣傳,回響好勁,今年再接再厲,基金主席陳晴一於搵埋藝人林峯、洪卓立、仲有跳水皇后郭晶晶一齊變身海洋生物,拍攝最新一輯電視廣告,呼籲香港市民「為海洋發力」!

九龍區賣旗日7月2日,保育基金義工團隊會賣旗籌款,善款會用於香港鯨豚擱淺跟進工作、本地物種科研項目及社區教育工作等。陳晴話,今年基金特別賣旗日,製作印有60款亞洲區內野生動物珍貴照片嘅精美旗紙,包括中華白海豚、大熊貓、全球野外僅餘少於100隻嘅中華鳳頭燕鷗等受危物種,等大家買旗支持保育基金喺香港嘅保育工作之餘,帶出「生物多樣性」好重要呢個信息。

講番廣告,林峯、洪卓立同海洋保育大使郭晶晶,齊齊演繹海洋生態中唔可以缺少嘅珊瑚,加埋一班扮八爪魚、蟹同魚仔嘅小朋友,個個造型都好趣致可愛。今年保育基金仲特別揀咗6個瀕危或受危物種,推出一套六款以海洋保育為題的限量版貼紙及小冊子,賣旗日前可供公眾訂購,希望喚起大眾對生物多樣性和海洋保育的關注和行動,想支持保育工作,可以電郵opcf@oceanpark.com.hk訂購。

撰文: 黛安 消息特靈八卦公關
欄名: 八卦名利場