3分鐘131人自拍 發哥誓破 Selfie健力士紀錄

「發哥」周潤發公認是Selfie能手，由他揸機永無失手。昨日發哥就趁電影《寒戰2》宣傳，親自揸機與兩位主角郭富城、梁家輝及現場粉絲，在三分鐘內完成與131人自拍，相信能刷新健力士世界紀錄。

被封為「Selfie King」的發哥，人人見到他都爭住要跟他玩自拍，昨日他就負責「揸機」自拍，在現場的專業人士見證下挑戰世界紀錄。期間發哥更指揮打燈甚至關掉熒幕，務求以最佳效果完成今次創舉。可是第一次挑戰時，發哥意外「甩手」，他主動提出再來一次，結果成功與131人自拍，他更表示一次過影了1,576張相。

城城與火鍋為伴

挑戰完畢後，城城表示最高興是由發哥揸機，家輝就戥發哥手軟。城城笑言本身都愛Selfie，尤其這是時下熱門的社交手法，問到他喜歡跟誰玩Selfie？他笑言：「火鍋。本身鍾意打邊爐，加上每次同朋友一齊食，個個都話要Selfie，（咁人呢？）我助手囉，因為收工通常都係佢陪我食飯。」城城又謂，返港此行來去匆匆，昨日完成《寒戰2》活動後，即晚就飛往馬來西亞拍電影，連跟媽媽見面的時間也沒有，他苦笑謂大馬天氣炎熱，惟有靠火鍋做伴。

至於梁家輝的愛女近日被影到與男仔在街上咀嘴拍拖照，他聞言後笑謂：「又畀人影到？其實我都唔知你哋影到乜，所以無辦法答到你哋。（行街咀嘴相。）佢一定唔會咁嘅，我同佢行街都冇咀嘴，我諗你哋認認錯人。」

採訪：Pauline

攝影：林良明

編輯：林梓添

設計：梁政敏