黛安
黛安

恒隆陳啟宗出書 結集25年「致股東函」

發佈時間: 2016/05/12

恒隆陳啟宗出書 結集25年「致股東函」

綠色的書封面上,用簡單綫條勾劃出一棟棟建築物,「呢棟係大連恒隆廣場?吖,應該係瀋陽恒隆廣場先啱!」設計看似簡單,書的內容卻是恒隆集團及恒隆地產董事長陳啟宗(Ronnie)多年來的心血結晶。呢本珍藏書冊《25 Years in Retrospect》,將1991年開始,Ronnie為恒隆集團及恒隆地產年度報告書內親筆撰寫嘅「致股東函」結集一齊,25年夾夾埋埋寫咗超過19萬英文字。

每年中期同年終報告都咁畀心機寫致股東函,除咗同股東溝通,等佢哋了解集團發展方向,相信「有人認真睇」係動力之一,Ronnie話估唔到除咗機構投資者有睇,小股東都好畀心機鑽研,「每年股東會聽佢哋問問題,就知真係有仔細睇」。

唔止睇咁簡單,聽集團助理董事關則輝(CF)講,致股東函文尾有主席電郵地址,股東仲會透過電郵表達對集團發展嘅意見。咁Ronnie會唔會回信先?Ronnie笑住話,雖然唔會全部親自回覆,但部分來信真係「好值得覆」,例如有位30幾歲內地股東,自己親身走訪恒隆喺內地不同商場,再寫了長長的信分析各個商場發展、有讚又有彈,令Ronnie好有「識英雄重英雄」嘅感覺。另外,Ronnie亦試過睇完電郵後,「唔止覆,仲請埋佢嚟食飯」𠻹!

撰文: 黛安 消息特靈八卦公關
欄名: 八卦名利場