【聲明】港生活網站並無進行電話推廣活動

黃飛鴻功夫宴 嘗「佛山無影腳」

發佈時間: 2016/05/12

英皇集團旗下澳門英皇娛樂酒店開業十周年慶祝有唔少推廣,收到公關姊妹消息,原來中菜廳皇廷閣早前推出「黃飛鴻功夫宴」,話要向一代宗師黃飛鴻致敬,大廚除咗從黃飛鴻故鄉佛山市南海食材着手,仲特登以黃飛鴻獨特招式做菜式靈感。

酒店中餐行政總廚林國榮師傅構思菜式時,就喺佛山市南海區旅遊局協助下,親身走訪黃飛鴻故鄉南海西樵鎮,兼拜會黃飛鴻第四任妻子莫桂蘭嘅嫡傳弟子李燦窩。林師傅更笑指自己同黃飛鴻有個共通點,就係識功夫,「分別係我熟練嘅係廚房功夫」。

講番菜式,大家提起黃飛鴻,最熟悉肯定係絕招「佛山無影腳」,聽李燦窩分享先知,原來呢個只係電影虛構,現實中黃飛鴻有招獨創秘技,叫「裙底穿心腿」;因為一般練武之人側身起飛腿,但黃飛鴻就改良從正面起腳。林師傅就用陳年滷水慢火浸泡肉質幼嫩的乳豬前腿,感受黃飛鴻絕技影子。

撰文: 黛安 消息特靈八卦公關
欄名: 八卦名利場