黃飛鴻功夫宴 嘗「佛山無影腳」

英皇集團旗下澳門英皇娛樂酒店開業十周年慶祝有唔少推廣，收到公關姊妹消息，原來中菜廳皇廷閣早前推出「黃飛鴻功夫宴」，話要向一代宗師黃飛鴻致敬，大廚除咗從黃飛鴻故鄉佛山市南海食材着手，仲特登以黃飛鴻獨特招式做菜式靈感。

酒店中餐行政總廚林國榮師傅構思菜式時，就喺佛山市南海區旅遊局協助下，親身走訪黃飛鴻故鄉南海西樵鎮，兼拜會黃飛鴻第四任妻子莫桂蘭嘅嫡傳弟子李燦窩。林師傅更笑指自己同黃飛鴻有個共通點，就係識功夫，「分別係我熟練嘅係廚房功夫」。

講番菜式，大家提起黃飛鴻，最熟悉肯定係絕招「佛山無影腳」，聽李燦窩分享先知，原來呢個只係電影虛構，現實中黃飛鴻有招獨創秘技，叫「裙底穿心腿」；因為一般練武之人側身起飛腿，但黃飛鴻就改良從正面起腳。林師傅就用陳年滷水慢火浸泡肉質幼嫩的乳豬前腿，感受黃飛鴻絕技影子。