聽日7仔鬥快換 4款Le Creuset「鍋」心小盒子

7-Eleven同Le Creuset合作推出一套十款小「鍋」心餐具，各位姊妹換齊未？見粉絲咁鍾意，7仔再加推第二輪換購，聽日開始推出四款「鍋」心小盒子！小盒子設計簡約，分別有粉綠、粉紫、粉紅同橙色四種顏色，睇真啲，盒蓋上面嘅小裝飾，都用咗Le Creuset經典漸變色「鍋」形設計，一睇就知粉絲又要落力儲印花啦！

公關姊妹話，盒子直徑9.5cm，高度大概7cm，仲特別強調符合國際食物安全標準，用嚟裝小食又得，裝小飾物都得，夠實用又夠靚。換購行動星期三即係聽日就會開始，7個印花加22蚊、或者18個印花免費隨機換一款，聽講今次小盒子數量有限，換完即止，唔再補貨，亦無預售，大家要把握機會啦！