惡搞《G-1格鬥會》化身男版鄧穎芝 視迷鼓掌鵬哥試fight 堅入戲

玩惡搞玩到出神入化的盧海鵬（鵬哥），近日為網上貸款公司拍廣告短片，戴上金色假髮曬巨腩化身ViuTV《G-1格鬥會》的女將鄧穎芝（Vangie），與YouTuber薑檸樂（蕭慶峰）拳來腳往，獲網友大派Like，不少人讚鵬哥超靚女，Vangie更聲言二人打番場，收視必爆燈。

縱橫演藝圈超過40載的鵬哥，可說是扮嘢界始祖，80年代於《歡樂今宵》變身羅文演繹《幾許瘋語》，又曾經惡搞張國榮大唱《STAND噏》。不過，鵬哥的經典莫過於模仿徐小鳳穿上黑白波波裙的造型，兩年前更曾踏上紅館舞台為小鳳姐的個唱擔任嘉賓，令觀眾睇到真假小鳳姐同場，贏盡掌聲。鵬哥即將為ViuTV拍攝30集處境劇《三一如三》，繼續在娛樂圈發放笑能量，不過，他近日率先在網友面前試fight爆笑彈，全因鵬哥為某網上貸款公司拍攝網上廣告於前日推出，玩盡近日ViuTV的話題真人騷《G-1格鬥會》。

Vangie約戰鵬哥搶收視

廣告短片全長約1分鐘，鵬哥的造型擺明惡搞昨晚在《G-1格鬥會》打低Hazel入決賽的女將鄧穎芝（Vangie），他戴上金色假髮及拳套，以女裝運動look曬巨腩，挑機年輕數十年的YouTuber薑檸樂。兩個雄赳赳的大男人齊齊男扮女裝打MMA，雖然在台上對陣是擺明借位，但鵬哥七情上面被打到頭擰擰，最終亦順應劇情成為薑檸樂的手下敗將。

事實上，鵬哥的造型玩味十足，加上食正近日《G-1格鬥會》已進入白熱化階段，令網友看得大呼過癮，就連鄧穎芝本人也非常受落，特地在fb轉發該短片，更反問：「鵬哥你係咪扮緊我？睇個肚腩……都應該係喇！」她又指，真假Vangie對戰必定收視爆燈。至於網友們亦激讚鵬哥試fight正到爆，更有人高喊鵬哥比正版更靚女。

撰文：Steven、Pat

協力：采兒

編輯：黃寶恩

插圖：何樂

設計：鄧俊明