梁詠琪：囡囡鍾意賴床似足我

本周日是一年一度的母親節，圈中不少靚媽早已計劃與家中小寶貝慶祝，同樣誕下混血靚B的梁詠琪（Gigi）、Ana R.、周汶錡與Jesscia C.，為本報細說為人母親的苦與樂。

榮升母親已一年多的Gigi，計劃母親節當天與女兒祈淑菲（Sofia）、母親及外婆四代同堂在家中食飯慶祝，她笑言：「已經估到老公會送花畀我，我都會買紮花送畀媽咪同婆婆，我哋都習慣用花代表心意。」

Gigi表示被女兒需要的感覺愈來愈強。「佢眼瞓或肚餓就會搵我，乜都想畀我睇，睇住佢一日一日咁學嘢，真係好開心。」過去一年，最令她難忘的是餵哺母乳的十個月，Gigi說：「當時冇晒自己嘅自由同時間，但又覺得好開心，為佢付出呢件事好值得。」提到Sofia跟自己哪裏最相似？Gigi笑說：「個女好鍾意賴床，呢方面同我好似，腳大就似老公，同埋佢好鍾意笑，都似我哋兩個。」

Ana R.為湊女匿廁所爆喊

名模Ana R.去年11月誕下愛女Maya，五個多月大的Maya手長腳長，遺傳Ana的模特兒身形。「囡囡生得高又多頭髮，大家都以為佢已經一歲大。」提到湊女辛酸，Ana坦言幾乎犧牲一切。「試過忙到一星期冇洗頭，時間全部畀晒屋企同囡囡。」

最初她照顧BB尚未上手，加上旁人有太多意見，令Ana一度壓力爆煲。「即使你唔識嘅人都批判你，我起初又唔明BB做咩成日喊，曾經獨自匿喺廁所狂喊，所以我好敬重每位為子女犧牲嘅媽媽。」幸好Ana得到媽媽教路，學懂有壓力時一定要識「唞氣」，「當覺得唔開心或壓力大，記得深深呼吸一下，會舒服好多。」

Jessica C.女兒Tessa好大食

Jessica C.今年三月為安志杰誕下女兒Tessa，目前身在美國湊B的JC，將會一家三口首次慶祝母親節。JC指囡囡胃口實在太好，幾乎每隔一、兩小時就要餵哺母乳，雖然她感覺困身又吃力，但仍相當享受這種幸福的辛勞。

周汶錡送「樓」畀Jacques

周汶錡（Kathy）愛子雷棨宇（Jacques）是中法混血兒，十個月大的他已成為圈中年紀最細的小鮮肉男神。Kathy指兒子太活躍，自己一定要睇到實，「佢開始識爬，我唔小心睇漏一眼，佢就喺床仔跣落地撞親，搞到送咗層『樓』（瘤）畀佢！好心痛，真係一秒都唔可以失策。」

她笑言第一次以媽咪身份慶祝母親節，感覺新鮮，「我會同老公食飯，可能多份禮物收。」又透露想為Jacques多添一個弟妹，「仔女冇所謂，如果生仔，兩兄弟可以打下交。」

撰文：倪小珊、李潔盈

編輯：黃寶恩

設計：nc