坐X-wing飛越太空山 星戰打到去迪士尼

《星球大戰》電影播完，但熱潮可以話係從未停止，收到公關姊妹消息，今個夏天，即係6月11日開始、大家去到香港迪士尼樂園嘅「明日世界」，可以體驗全新項目——「星球大戰：入侵明日世界」，真係要嗌番句：「May the Force be with you！」

新體驗景點入面，「星戰極速穿梭」將「飛越太空山」的極速旅程重新演繹，大家可以坐住《星球大戰》入面X-wing戰機同鈦戰機激戰。感覺就好似置身《星球大戰》經典戰鬥場面，仲有機會近距離接觸正邪兩股勢力靈魂人物。如果大家想從頭到尾感受星戰氣氛，指定日期預訂香港迪士尼樂園酒店或迪士尼好萊塢酒店嘅客房，可選擇另加《星球大戰》主題房間布置。